Kolasib District MJA ten Buhchangphai Solar Pumping WSS an tlawh
Vawiin khan Kolasib District MJA member te chuan tun hnaia Comptroller and Auditor General of India report tih chhuah Chief Minister-in Assembly session hnuhnung bera a pharh ah March 31, 2023 ah hnathawh zawh loh a tarlan zinga mi, Buhchangphai Solar Water Supply Scheme chu Kolasib District MJA member te chuan a hmunah an tlawh.Buhchangphai Solar Pumping Water Supply Scheme tih puitlinna tur hian Project pathum siam ani a, cheng nuai 14.25 senga siam ‘Construction of Battle Wall Sedimentation Tank of Water Plant’ chu thla hnih chhunga zawh hman tura tih a ni a, hna hi May 16, 2022-ah thawh ṭan niin zawh hun tura tih chu July 15, 2022 a ni. He hna bakah hian cheng nuai 6.77 seng a siam ‘Construction of Zo Rawra Filter of Water Plant’ chu thla khat chhunga zawh fel tur niin, June 17, 2022 aṭanga July 15, 2022 inkar chhunga zawhfel tur a ni. Project dang pakhat ‘Construction of Clear Water Sump of 1,00,000 Litres Capacity’ chu thla hnih chhung bawka zawh fel tura tih niin September 12, 2022 ah thawh ṭan a ni a, November 9, 2022 ah zawh fel tur a ruahman niin, cheng nuai 7.85 senna tur a ni. CAG aiawh leh PHE Department aiawhte chuan heng Project te hi January 21, 2023 khan joint verification neiin an tlawh a, zawh hun bi tuk ni mahse an tlawh hun lai hian hna hi zawh ala ni lo.
Buhchangphai a Kolasib District MJA te lo dawngsawngtu Buhchangphai Village WATSAN Committee Chairman Pu Lalsangbera, VCP ni bawk chuan, an khaw Tui lakna Solar Pumping WSS siamna hmun hi Pu C. Rongenga, Buhchangphai in a thlawna a pek niin, Sangha dil awmna a nih avangin a tirah hnathawh a harsat thu a sawi a, Lei hi nghah char a ngaih vangin hnathawh ṭan nghal theih a ni lo, a ti. Hnathawh ṭan tlai avangin a hun takah zawh ni lo mahse, August 17, 2023 aṭang khan an khaw Tui lakna hi an chhawr ṭan a, tunah chuan an ṭangkaipui hle tih a sawi a. Tui pump-na tura dah Solar plate te chuan Electric Power 37.5kW a siam chhuak thei a, tui pump-na atan an khawl hman hi 30hP niin, khawl chu a chawm zo ṭha hle niin a sawi. Heta ṭanga tui an pump chhuah hi main reservoir tanky, Tui litre nuai khat dawngah an pump chho a, hei bakah hian Tanky dang pahnih – Gosen Veng leh Saron Veng ah te khawl hmang bawk hian pump chho in heta ṭang hian mipuite hnenah Tui hi sem chhuah leh ṭhin a ni tih a sawi bawk. “Ni a sat ṭhat phei chuan Tui Tanky pump khat turin hun a duh rei lova, Tanky pahnihba Tui liam veng turin WATSAN Committee chuan mi pahnih an ruai tih a sawi bawk.
Kolasib District MJA hruaituten PHE, Kolasib WATSAN Division Sr. EE Pi Lalrosangi an biakna ah Buhchangphai khua a cheng chhungkaw 233 chuan Tui Connection an nei tawh a, Department lam chhinchhiah dan in, Buhchangphai ah Tui Connection neilo an awm tawh lova, chutihlai chuan hmun dang atanga pem lut leh In dang thar te an awm thin avangin Tui Connection nei lo palh erawh an awm thei niin an sawi.Buhchangphai Solar Pumping Water Supply Scheme hmang hian ni khatah Tui litre nuai khat singli pump chhuah ṭhin a ni a, ni khatah mi pakhatin tui hi litre 55 vel dawng ziah tur anga chhutin, Project design ang chuan he Scheme hi kum 30 chhung Buhchangphai mipui chawm thei tura tih a ni.Buhchangphai Solar Pumping WSS hi nikum June 20, 2024 khan Buhchangphai WATSAN Committee te enkawl chhunzawm turin inremna siam in an kutah hlan a ni tawh.
