Home Minister hovin Committee on Prevention of Firecracker and other Pyrotechnic Materials thukhawm
Vawiin khan Home Minister Pu K. Sapdanga hovin Committee on Prevention of Firecracker and other Pyrotechnic Materials chu SAD Conference Hall, MINECO-ah an thukhawm a. Kumin hunpui lo thleng tur vuakveta halpuah leh a kaihhnawihte khapna kalpui dan tur bakah Working Committee-in halpuah leh a kaihhnawihte khapna tur Dan a duan thar (Draft Bill) te thlir ho a ni.
Thutkhawmnaah hian nikum lama halpuah leh a kaihhnawih hal chi chi hrang hrangte khapna Mizoram sawrkarin hlawtling taka a kalpui tawh dante Aizawl SP Pu Rex Zarzoliana Vanchhawng hnen atangin ngaihthlak a ni a. Nikum hunpui vuakvetah khan halpuah leh a kaihhnawih hal, lei leh hralh bakah siam chhuah kaihhnawihah mi 53 man an ni a, heng zinga 14 te chu thiam loh chantir an ni. Mizoram Police leh tlawmngai pawl tangrualte’n an mante hi a hlut zawng chu Rs 23,13,555/- hu a ni.
Thutkhawmah hian kumin hunpui lo thleng turah pawh mipui vantlang him zawkna tur leh boruak thianghlim zawk a awm theihna tura hmalak dan turte rel a ni a. Hei bakah hian Working Committee buatsaih, Halpuah leh a kaihhnawih khapna tur Dan thar duan mek chu thlirho niin, a thuphungin Committee chuan a pawm nghal a; thutkhawm leh hunah ennawn leh tura dah a ni. Vawiina meeting-ah hian Chief Secretary Pu Khilli Ram Meena, a kaihhnawih Department hrang hranga Secretary-te, Home Department hnuaia Officer-te bakah Central YMA hruaitute an tel a ni.
