KOLASIB BAWRHSAP IN STATE RAMRI A ILP CHECK GATE-TE A HMUNAH A TLAWH
Vawiin chawhma khan Kolasib Bawrhsap Pu Robert C. Lalhmangaiha chuan Zophai leh Phaisen a Mizoram leh Assam State inrina chu a hmunah enfiahna a nei a. Bairabi leh Phaisen Police Check Gate-a Inner Line Permit (ILP) pekchhuahna leh National Highway 154 a Bairabi to Tuichhuahen Zero Point kawng siam laite chu a hmunah tlawhin, Bairabi khaw chhunga 2 Lane kawng siam chungchangah Land Owners te kawmna a nei bawk.
Tunhnaiah Assam State atangin Mizoram State chhunga luh tum an thahnem thin hle a. Hemi avang hian Mizoram luhka a Police Station Check Gate-ah ILP siam hna pawh ngawrh taka kalpui mek a ni. Hemi kawngah hian Kolasib Bawrhsap Pu Robert C. Lalhmangaiha chuan Inner Line Permit chu fimkhur zawk leh felfai taka pekchhuak a tul thu sawiin vawiin khan Bairabi leh Phaisen Police Check Gate chu a hmunah a tlawh a. Check Gate-a thawktute chuan Sponsorship nei lo leh Document felfai tak nei lote chu Inner Line Permit (ILP) pekchhuah an nih loh thute sawiin, Kolasib Bawrhsap chuan Check Gate-a thawktute leh ILP buaipuitute hnathawh chu fakawm hle a ni, a ti.
Kolasib Bawrhsap hian Bairabi Police Station-ah Bairabi a Landowners’ Association hotute thukhawchang sawina a neihpui a. National Highway 154 siam mek a Sawrkar hmalakna chungchangte leh harsatna awmte sutkian dan ngaihtuahhona neih a ni. He hunah hian Bairabi khaw chhunga 2 Lane kawng siam hnathawh meka ramneitute’n Compensation chungchanga harsatna an tawh chu sawi hona neih nghal niin hmalak dan tur an rel ho a ni.Vawiina Kolasib DC in ILP Check Gate leh National Highway 154 a enfiahna ah hian Kolasib Addl SP Pu F. Lalthlamuana bakah Land Revenue & Settlement Department hotuten an tawiawm a ni.
