Champhai DDMA leh NDMA chhiatrupna lak invenhimna chungchang sawiho turin thukhawm
Vawiin khan DC Conference Hall-ah Champhai District Disaster Management Authority (DDMA) leh National Disaster Management Authority (NDMA) chu thukhawmin chhiatrupna laka invenghim tura tih tawh te, tih tur te leh tih dan tha an sawi ho a, NDMA atang hian Joint Advisor Dr. SK Jena, Asst. Financial Advisor Pu Pravana Kumar leh Sr. Consultant Pu Ranjan Kumar Borah te an lo kal a ni.
NDMA lam atangin Pu Ranjan Kumar Borah chuan NDMA hmalakna te, Disaater Management Act siamthat a nih dan te, district level atanga international level thlenga chhiatrupna thleng tur ven nana thawhhona neih dan tur te a sawi a. Champhai DDMA atangin SDC Pu Lalchhuanawma Ralte leh Khawzawl DDMA atangin SDO (Sadar) Pu Suvigya S.
Chandra te’n district hmalakna te, chhiatrupna thlen thulha bungrua, motor an neih dan leh an inrin dan te, harsatna leh mamawhna an neih hrang hrang te an sawi bawk. Presentation zawh hian Joint Advisor Dr. SK Jena hovin thukhawmte’n sawihona an nei a, zawhna leh chhanna lehlam lehlam atangin inzawtin department hrang hrang hnathawh te inhrilhhriatna hun hman a ni. NDMA hotute hian naktukah Vengsang, Bethel leh NH-06 kalkawnga leimin an en dawn bawk a ni.
