Serchhipah India Independence Day vawi 79na pualin kawng zawh
Vawiin khan Serchhip khawpuiah India Independence Day vawi 79na lawmna peng pakhat atan Tiranga Yatra neih a ni a. School naupang te, college zirlai te leh mipui mimir thahnem takin kawng an zawh a ni. Kawng zawh khar nan Serchhip DC Pisapui tualzawlah intawkkhawmin Pu Paul L Khuma chuan thu a sawi a. India-in British Sawrkar atanga zalenna a hmuhna ni champha lawmna peng pawimawh tak pakhat a nih thu a sawi a. India ram hmun hrang hranga cheng, hnam hrang leh tawng hrang hmangtute hian inunauna leh inpumkhatna thinlung thar puin, kan thinlungah theuh i vawng nung thar leh ang u tiin kalkhawmte a fuih.
Serchhip SP Pu Gavit Gogna pawhin thu sawiin vawiina kawng zawhtuten an ken India Flag hlutna leh a pawimawhna te, zah taka ken tur a nih zia leh kan hnam inpumkhatna tilangtu a nih thu a sawi a ni.
Kawng zawh hi hmun hnih atanga bul tanin chawhnu dar hnih (2PM)-ah an chhuak tan a. Serchhip College peng atanga kal tan te leh P&E Veng Mini Park atanga chhuak te chu IOC Venga Serchhip Pisapui panna kawngah an infinkhawm a, kharna inkhawm tawi buatsaih zui nghal a ni. Vawiin vek hian Serchhip DC Pisapui Hall kawtah leh I&PR Conference Hall ah te India Independence Day vawi 79na pual Photo Exhibition neih chhunzawm nghal a ni a. August ni 7 leh ni 8 ah te Exhibition hi tum 3 huaihawt a lo ni tawh bawk a ni.
