Health Minister-in Standard Treatment Guidelines (STG) 2025 tlangzarh
Vawin Health & Family Welfare Minister Pi Lalrinpuii chuan a pisa-ah Mizoram puala a hmasa ber ni turin Standard Treatment Guidelines (STG) 2025 (Natna chi hrang hrang 248 nihphung leh enkawlna awmna bu) a tlangzarh.Health Minister Pi Lalrinpuii chuan hetiang thil ropui leh tha India ram-ah pawh State nazawngin anmahni puala an neih theih loh a vawi khatna atan Mizoram in kan nei thei hi ropui a tih thu a sawi a. Mizoram hmun kilkhawr ber thlenga natna hriat leh enkawlna kawnga kan Doctor te leh hriselna lama thawktu ten tangkai taka an hman ngei a beisei thu a sawi. Hemi buatsaih tura State Health Team te, Core Committee leh Expert Team te chungah lawmthu a sawi bawk.
He Standard Treatment Guidelines Edition hmasa berah hian Natna hrang hrang 248 nihphung leh enkawl dan awmin Specialist hrang hrang ten India mai nilo khawvel huapa mithiamte siam atanga kan State mil leh mamawh tur ang bera an duan a ni a. A bu a siam anih mai bakah hian Web- version, online atanga en zung zung theih tura duan a ni bawk.
STG 2025 tlangzarh inkhawm hi Dr. Lalthlengliani, Principal Director, Health & Family Welfare Department in kalkhawm te lawmna thu sawiin Dr. Vanlalhruaii, Secretary, Core Committee on STG in Guidelines buatsaih dan chungchang a sawifiah bawk. Dr. Lily Chhakchhuak, Project Director, MHSSP leh Mission Director, NHM in mi thahnemngai te zara STG tha tak tlangzarh a ni ta chu lawmawm a tiin hmalatute leh kalkhawm te chungah lawmthu a sawi bawk.Expert team-ah hian Member 19 awmin Zoram Medical College & Hospital atangin experts 13, Civil Hospital Aizawl atangin experts 3, Kulikawn Sub-District Hospital atangin expert 1, Directorate of Hospital and Medical Education leh Mizoram State Health Care Society atangin Expert 1 ve ve an tel a ni.
