Lungleiah Sampoornata Abhiyan hnuaia lawmman semna leh Aakanksha Haat hawnna hun hman a ni
Vawiin khan NITI Aayog hnuaia Aspirational District 112 leh Aspirational Block 500 huam chhunga hmasawnna tluantling a awm theih nana beihpui thlak, ‘Sampoornata Abhiyan’ kalpui meka Lungsen Aspirational Block hmasawnna tura thawktute chawimawina hun, ‘Samman Samaroh’ leh kar khat awh tur tualchhung thil siam chhuah pho chhuahna, ‘Aakanksha Haat’ hawnna hun chu Lungleia Saikuti Hall Ground Floor-ah buatsaih a ni.
Lunglei District Bawrhsap Pi Navneet Mann chuan Lungsen RD Block chu India ram block hnufual, dawm kan ngai zingah a tel avangin sawrkar laipui aṭanga chhawmdawlna tur ruahman kal tlang leh state sawrkar leh district-a department hrang hrangte thawh hona kal tlangin hmasawnna tluantling a awm theih nan hma lak chhoh reng a nih thu leh hmasawnna tam tak hmuh a nih thu sawi a. Project BLOOM kal tlangin nu leh naupang hriselna leh chawi kanna atana hma lakna hrang hrang kalpui a nih dan te, Healthy Lunglei District Campaign leh health programme hrang hrang hnuaiah hriselna dinhmun endik runpui te, block mipuite’n awlsam zawka sawrkar an dawr theihna tur ruahmanna te, English Literacy Programme hnuaiah primary school zirlaite’n English bulṭhut an thiamna tura hma lakna kalpui a nih dan te a tar lang a. Lungsen Block-a hmasawnna chu department mala tih theih loh tam tak chu thawh hona nen a tih theih tih tar langtu a ni, a ti.
Lunglei Sub-Deputy Commissioner Pi Lalnunchhani Hnamte chuan hun a kaihruai a. Aspirational Block Programme (ABP) hnuaia hmasawnna tehfung (indicator) paruk zingah Lungsen Block chuan tehfung pali-ah 100% tihlawhtlingin, bronze medal a dawng a. He hlawhtlinna kawnga thawktu hrang hrangte hnenah chawimawina hlan a ni a. August ni 1 aṭanga ni 8, 2025 chhunga Saikuti Hall Ground Floor-a Lungsen Aspirational Block huam chhunga Self Help Group (SHG) leh tualchhuak thil siam chhuaktute thil siam chhuah pho chhuahna, ‘Aakanksha Haat’ chu Bawrhsap Pi Navneet Mann chuan hawngin, Lungsen BDO Pu Lalhruailiana Zote chuan lawm thu sawiin hun a khar.
ABP indicator 6 zingah – hriselna leh chaw ṭha (health & nutrition) hnuaiah zunthlum (diabetes) endik, thisensang (hypertension) endik leh raipuarte tana chaw ṭha (supplementary nutrition) pek ṭhat kawngah leh agriculture hnuaiah lei hriselna endik leh soil health card pek chhuah kawngah te Lungsen Block hian target 100% a hlen chhuak a. Indicator dang pahnih – raipuar an nau pai tirh thla thum chhunga inziah luh kawngah leh SHG-te tana bul ṭanna sum lu (revolving fund) pek chhuah kawngah pawh hmasawnna nasa tak hmuh a ni bawk.
He hunah hian Lungsen Block Development Officer Pu Lalhruailiana Zote hnenah Bronze Medal leh certificate hlan a nih bakah, district level-a department hotute – Senior Chief Medical Officer, District Programme Officer (Women & Child Development) leh District Agriculture Officer te, block level official – PHC Lungsen Medical Officer, Lungsen ICDS Child Development Project Officer, Lungsen Block MzSRLM-a Block Mission Manger leh Cluster Coordinator pahnih te, a hmatawnga thawktu (frontline worker) – anganwadi worker 44, anganwadi helper 44 leh health official/worker 15 te hnenah chawimawina thuziak hlan a ni bawk.
Aakanksha Haat-ah hian Lungsen RD Block hnuaia SHG-te thil siam – kut themthiam thil (handicraft) leh ei tur (food item) chi hrang hrang pho chhuah a nih bakah, Lunglei RD Block aṭangin tahpuan (handloom); District Agriculture Office aṭangin thlai chi, thlai enkawlna damdawi, kut hna thawktute thar chhuah hrang hrang leh PM-KISAN service; KVI Board Lunglei aṭangin handicraft item; leh District Horticulture Office aṭangin pangpar leh a kaihhnawih, ei leh in tur chi hrang hrang te pho chhuah a ni a. Deputy Commissioner office, health department leh bank lam te’n mipuite ṭanpuina tur service chi hrang hrang – Aadhaar siam ṭhat, tribal, residential leh income certificate dilna, bank account hawn, NCD natna endik te an kalpui bawk a. Kar leh Thawhṭanniah Commerce & Industries lamin sumdawnna kalpui dan inzirtirna (marketing & business strategies) leh Nilaini-ah RSETI lamin thiam thil inzirtirna (skill development programme) an buatsaih bawk ang.
