HOME MINISTER HOVIN FORENSIC SCIENCE LABORATORY DINHMUN BIHCHIANNA NEIH A NI
Vawiin khan Home Minister Pu K. Sapdanga hovin Directorate of Forensic Science Laboratory (FSL) dinhmun thlir hona, ‘One Day Review Meeting of Forensic Science Laboratory’ chu FSL Conference Hall, MINECO-ah neih a ni a, Home Secretary Pu Vanlalmawia’n meeting a kaihruai a ni.
Home Minister chuan FSL chu mipui leh ram inngahna, thu buai tam tak chinfelna hmun leh tunlai crime chi hrang hrang chhuichhuahna kawnga innghahna bul pawimawh tak an nih thu a sawi a. Mizoram FSL pawh hmanraw tha zawk nena thawmthat a pawimawh thute a tarlang a. Home Department hnuaia peng hrang hrangte inkarah thawh hona tha tak a awm zel a beisei thu a sawi bawk a ni.
Vawiin meeting-ah hian Pu T. Lalropuia, Director, FSL hnen atangin Directorate of FSL hmalakna hrang hrangte ngaihthlak a ni a, FSL thawmchakna atana thil pawimawh leh hmachhawp chi hrang hrangte sawi ho a ni. FSL hian Mizoram district hrang hranga police officer-te tan training a buatsaih thin a, hnu chhui kawnga an thawh that avang hian kum 2023 khan Central Fingerprint Bureau, NCRB, Govt of India atangin ‘Best Case Award in Smart Use of Fingerprint Science in Investigation’ lawmman an lo dawng tawh bawk. Mizoram FSL-ah hian DNA division siam niin, India rama Civil & Criminal Case DNA Profiling ti thei Laboratory 17-na a ni a. Modernisation of Forensic Capabilitites kaltlangin Mobile Forensic Vehicles 10 leite chu endik vek an ni tawh a. Mizoram FSL thawmchakna tur hian April 3, 2025 khan National Forensic Sciences University (NFSU), Gandhinagar nen thawh hona thuthlung (MoU) ziah a ni tawh bawk a ni.
