Health minister-in sairang dinthar health clinic building a hawng
Sairang Dinthar Health Clinic Building thar sak chu vawiin khan Health & Family Welfare Minister Pi Lalrinpuii chuan a hawng. Minister hi Aizawl West-I bialtu MLA Pu TBC Lalvenchhunga, Adviser to CM (Finance & Planning) chuan a tawiawm a ni.Minister Pi Lalrinpuii chuan Sairang Dinthar-in Health Clinic thar an nei chu a lawmpui thu sawiin, sawrkar chuan health clinic centre thar hawn mai bakah sub-centre atanga district hospital thlenga tihchangtlun a tum thu a sawi a. Hei hian khawpuia damdawiin tawt lutuk leh indaihlohnate a phuhruk theih ngei a beisei thu a sawi a. ICU leh health worker indaihlohna sukiang tura sawrkar hmalaknate tarlangin, Health Clinic chu inenkawl damna hmun atana mipuite’n an hman tangkai theih nan duhsakna a hlan a ni.
Bialtu MLA Pu TBC Lalvenchhunga, Adviser to CM pawhin thu sawiin, health clinic chu khawtlang tana rohlu leh chhawrnahawm tak a ni, a ti a. Health Clinic thar neih theih nana khawtlang hruaitute inpekna leh mipui tanrualna chhuanawm a tih thu sawiin, Sairang Dinthar mipuite chu he clinic hi hmang tangkai ngei turin duhsakna a hlan a ni.Clinic hawnna hun hi Dr. Vanlalfela, Health Services Director chuan kaihruaiin, khawtlang aiawhin VCP Pu Zonunthara’n thu a sawi a. Dr. Elsa Lalramzauvi Pachuau, MO, Sairang PHC-in lawmthu sawiin hun hman a khar a ni.
He hunah hian Pu Lalthazuala Rawite, Chairman, MIFPA; Dr. Zonunsangi Khiangte, Deputy CMO, Aizawl West leh khawtlang hruaitute an tel a ni. Health Clinic hawn zawh hnu hian Minister leh bialtu MLA te chuan Sairang PHC tlawhin, thawktute an kawm a. Central Medical Store, Zemabawk an tlawh nghal bawk.
