Adviser to CM-in Aizawl District Market Cooperative Society Annual General Assembly 2025 a hmanpui
Vawiin khan Adviser to CM Dr. Kc Lalmalsawmzaua chuan, Aizawl District Market Cooperative Society Ltd. (ADMACS Ltd.) Annual General Assembly, MJA Press Club, Treasury Square a neih chu khuallian niin a hmanpui. He hunah hian khuallian, Adviser to Chief Minister Dr. KC Lalmalsawmzaua chuan thusawiin, sawrkar flagship programme tihhlawhtlinna kawnga ADMACS Ltd. leh sawrkar-te thawhdunna a hlawhtling em em chu lawmawm a tih thu a sawi a. Cooperative Society-te chu mumal tak leh fimkhur taka an kal chuan ram leh hnam tana thawh hlawk tak leh hmasawnna tam tak thlentu an ni thei tih a sawi a. A bik takin sawrkarin kuthnathawktute a ngaih pawimawh avangin, ADMACS Ltd.-in kuthnathawktute tana an hmalakna leh loneitute hamthatna a kalpui tam takte chu ropui hlea a hriat thu a tarlang bawk a.
Society-in hma a sawn zel theihna turin hruaitute chuan thuneihna leh mawhphurhna chu thil inkawp tlat a ni tih hre reng turin a chah a. Ram hmasawnna thlen zel tura sawrkar thawhhopui chhunzawm zel turin kalkhamwte chu a sawm nghal bawk a ni. Aizawl District Market Cooperative Society (ADMACS) Ltd. hi kum 1982 khan Pu Lalbiakthanga leh mi thahnemngai 15 te chuan an din a. Vawiin thlengin ADMACS Ltd hian sawrkar thawhpuiin kuthnathawkte tan thahnemngai takin kuthnathawktute tan hma a la reng a. Kuthnathawktute mamawh hmanrua leh thlaichite pe chhuak thinin, tunah hian Fertiliser pe chhuak theih tura phalna (license) pawh sawrkar atangin an dil mek a. Kuthnathawktute tan awlsam zawka loan an pek chuah mai bakah, Sawrkar flagship programme hnuaia sawhthing chingtute hnenah ip (bag)te man man zawkin an pe chhuak bawk a ni.
Vawiina hun hman hi ADMACS Ltd. Chairman Pu Lt. Sanga chuan kaihruaiin, kalkhawmte lawmna thu a sawi a. Pu Lianthangpuia, CEO, ADMACS Ltd. hnen atangin ADMACS hmalakna leh kum kal taa ADMACS Ltd. chungchang report kimchang tak ngaihthlak a ni a. Hemi zawh hian ADMACS Ltd. hnuaia share thawh tha zual pathumte hnenah chawimawina thilpek hlan a ni a. Pu K. Liankhuma, Vice Chairman, ADMACS Ltd. chuan lawmthu sawiin hun hi a khar a ni.
