Sports minister leh gopichand-a ten badminton grassroot league final hun hmanpui
Tukin khan Sports & Youth Services Minister Pu Lalnghinglova Hmar chuan Mizoram Badminton Centre, Zuangtui-ah 1st Mizoram Grassroot Badminton League 2024-2025 kharna hun a hmanpui. He Grassroot League final hi Badminton Association of India Vice President leh National Badminton Chief Coach ni bawk, Pu Pullela Gopichand leh Pi Neelam Babardesai, Head of Sports, TATA Trusts te rawn zin denchhen a neih a ni a. Category hrang hrang 11 ah inelna neih niin, Badminton Grassroot Centre kalpui tha te leh Coach ti tha te hnenah chawimawina lawmman hlan nghal a ni bawk.
Sports Minister Pu Lalnghinglova Hmar chuan kum 2036-a India in Olympic thlen a tumah Mizoram thalai te a tam thei ang ber an tel theih nan hma lak chho mek zel a nih thu sawiin, sports discipline hrang hrang zingah badminton chu Mizo te tan India leh khawvel level-ah kan lan theihna a nih a rin thu leh, Olympic ah ngei pawh kan inlan theihna discipline pakhat a nih a beisei thu a sawi a. Tun dinhmunah pawh India aiawh tura H. Lalthazuala leh C. Lalramsanga te thlan an nih thu leh, anmahni ang dinhmun a ding thei thalai tam tak chher chhuak thei dinhmun ah MBA a din mek thu a sawi bawk. India ram leh khawvel level-a lang phak tur chuan training mumal taka kalpui a tul thu te, kan player-te training kan pek dan pawh kan thlak a pawimawh thu a sawi bawk. Pu Gopichand pawhin kum 1994-ah India Badminton in a hun tawn hniam ber a tawn thu sawiin, Commonwealth Games-ah pawh sorkar laipui in player a tirh loh thu a sawi a. Chumi hnuah kalphung mumal tak nena coaching kalpui a nih thu te, kum 30 dawn a ral leh meuh chuan India in World no 1 thleng phak 3 a neih thu te, World championship 15 a lak theih thu te a tarlang a. Mizoram ah ngei pawh kum 2017-2018 inkar atangin kalphung mumal tak neia training kalpui tan a ni a, kum 5 a liam deuh choh a, Mizoram chuan India team a tel thei player 2 a neih thu leh, India state dang atanga hetiang nei thei an awm loh thu a sawi bawk a ni.
He programme hi Pu H. Lalnunsiama, Senior Vice President, MBA leh MBA Project Monitoring Committee Chairman ni bawk chuan a kaihruai a, Dr K. Vanlaldinpuia, Secretary General hnen atangin report ngaihthlak a ni in, Prof. Lalhriatzuala, Secretary, MBA Project Monitoring Committee in lawmman leh chawimawina hrang hrang hlanna hun a hmang a, Pu Lalrinzuala Pachuau, Vice President, MBA in lawmthu sawi in hun a khar a ni. Report atanga tarlan a nih dan in, tun dinhmun ah Mizoram chhungah District Badminton Association 13 a awm a, club 220 in affiliation tiin, player 9729 in heng club ah te hian registration an ti a ni. Grassroot Centre 25 Mizoram hmun hrang hrangah kalpui mek a ni a, chungah chuan training nei mek naupang 1095 awm in, mipa 694 leh hmeichhia 401 an awm a ni. Champhai leh Kolasib ah Elite Centre a awm mek a, hengah hian player 27 (mipa 14 leh hmeichhia 13) an inzir mek a. Hei bakah ah hian Regional Competitive Training Centre, Zuangtui ah full time a training nei mi 25 an awm mek bawk a ni.
