Protected Area Permit Mizoramah hman a ni dawn
Home minister Pu K. Sapdanga chuan sorkar laipui duhdan angin Lengpui tumhmunah ramdang atanga lo zinte endik hna thawh tan a nih thu a sawi. Pu K. Sapdanga chuan sorkar laipui-in Myanmar ramri depa awm hmarchhak ram pathum Manipur, Mizoram leh Nagaland a protected area permit (PAP) leh restricted area permit (RAP) a thlahdulna a tihtawp leh tak avangin ramdang atanga lo zinte’n phalna an neih lo endikna atan Lengpui tumhmun a thlawhna atanga lo thlengte luhna hmun bulah hmun ruahman a ni, a ti a. Official lamin ruahmanna an siam tawh angin kalpui chhoh tur a ni a ti. Hemi chungchangah hian Mizoram sorkar leh ministry of home affairs (MHA) chu an inrawn tlang reng niin a sawi. Protected area regime an tih mai hi kum 14 thlahdul a nih hnu-ah ram thenawm Myanmar leh Bangladesh boruak avangin a taka hman leh turin nikum December thla khan MHA chuan thupek a chhuah leh ta a ni.
Home department hotute’n an sawi danin ramdangmi Mizorama lo zinte khuahkhirhna tuaithar leh a nih hnu hian RAP leh PAR hi online hmanga dil theihin MHA chuan a siam a, online hmang bawka phalna pek a ziahluh an ni tawh dawn a. He thil a taka kalpui tur hian home department chuan district tina SP-te bakah foreigner registration officer, SP CID (SB) te pualin training a lo buatsaih tawh a. MHA hnenah pawh ramdangmi lo zinte ziahluh leh lo buaipui kawnga thiltih a awlsam theih nan Aizawl khawpui-ah hemi pual bik pisa hi rawn din turin ngen a ni bawk. Hemi chungchangah hian March ni 10 khan chief minister Pu Lalduhoma chuan sorkar laipui inventhawnna chu a hriatthiampui thu assembly inkhawmah a lo sawi tawh a. Nikum chawhnu lam kum chanve vel chhungin ramdangmi 2,000 chuang Mizorama lo lut si-in khaw lai-ah hmuh tur an awm lo niin a sawi a.
A bikin UK mi, Russia leh Ukraine indona a kal pakhat chu Mizoram kaltlangin Myanmar ramah a lut a, hel pawlte indo dan a zirtir niin Pu Lalduhoma chuan a sawi a. A lo haw lam silaimu nen Lengpui tumhmunah man ani a ti a, Ramdangmi lo zinte khuahkhirh chu Mizoram sorkar chuan tha ti lo chungin sorkar laipui rilru erawh a hriatthiampui niin chuan a sawi a ni.
