Bana kaih innovation challenge ni 2-naah college 14 an inlan
Vawiin khan Vanapa Hall-ah Planning & Programme Implementation Department bultumin Chief Minister Bana Kaih Innovation Challenge pêng pakhat ‘Local Immersion Programme for Higher Educational Institutes’ kalpuina ‘HEI Sustainability Pitch for Progress’ neih a ni a. Pu TBC Lalvenchhunga, Adviser to Chief Minister chuan khuallian niin he hun hi a hmanpui a ni.
Local Immersion Programme hi Sustainable Development Goals (SDGs) lam hawia kalpui a ni a, SDG chungchang hriatna zau zawk zirlaite leh Mizoram mipuite’n an neih theih nana buatsaih a ni. He programme hnuaiah hian Mizoram chhûnga college zawng zawngte sâwm niin, district tina khaw hrang hrangah zirlaite zan riaka kalin, an khaw kalnate’n harsatna an tawhte leh mamawhte zirchiangin, chung an harsatnate chu chhawk zângkhai theih dan leh an hmasâwn zel theih dan tur ruahmanna an ngaihtuahsak a ni.
Zirlaite thiamna leh finna hi ram leh khawtlang hmasawnna tluantling thlentu a nih theih nan he Local Immersion Programme hi duan a ni.
