Vawiin tlai khan Mizoram pumpui a kohhran tam zawk chuan Krismas lawmna ruai an theh
Kohhran tam zawkah chuan zingkar atangin ruai buatsaihin fatute an che a, ran chi hrang hrang talhin kawng hrang hrangin ruai an buatsaih a ni. Kohhran tam zawk chuan vawiinah hian Kohhran inkhawm an ruahman lo a, lenkhawm erawh a awm tlangpui a. Tukthuan eikham atangin tlai ruai theh thlengin kohhran mipuite kohhran hall leh mimal in remchangah an lengkhawm a ni.
Kohhran thenkhatah chuan Biak In tualah naupang infiamna hrang hrang buatsaih a ni a, naupangin an hlut hle a, ruai theh hma zawng Sunday School zirtirtute buaipuiin an infiam a. Kohhran thenkhat chuan ruai theh zawha zaikhawmpui te buatsaihin a then chuan ruai theh zawh programme hran siam lovin zan inkhawm an ruahman thung a. Inkhawm bana lengkhawm tur te pawh an awm bawk a ni.
Mizoram chhunga kohhran thenkhat chuan naktukah hian ruai an la nawn dawn bawk a. Kum dang ang bawkin ruai theh hi Krismas lawmna kharna anga ngaih a ni chungin kum upa lam lunglengte chuan lenkhawm an chhunzawm zel dawn a, ruai nawn zui pawh thingtlang lamah chuan an awm rin a ni.
