Health Minister Pi Lalrinpuii’n vawiin khan Mizoram State Cancer Institute (MSCI) Zemabawk-ah cancer damlote tan inzai theihna a hawng
Health Minister Pi Lalrinpuii’n Mizorama damlo enkawlna hmun hrang hrang tihchangtlun nan CSR Fund dap zel a pawimawh tih a ti a, Company tam tak Mizorama lo luh an chak avangin ram tana hmasawnna tur ngaihtuah thiam a pawimawh tih a sawi.
He thu hi vawiina Mizoram State Cancer Institute (MSCI) Zembawk ah Cancer damlote tan inzai theihna ‘Surgical Services’ bultanna Operation Theatres Complex leh damlo 7 dah theihna ICU a hawnna ah sawiin Pi Lalrinpuii chuan MSCI ah inzai theihna leh ICU hawn chuan mipui harsa zawk tam tak, phai panna tur neilo ten nasa takin an chhawr tangkai thei dawn a ti a, Aizawl Civil Hopsital leh ZMC ah inzai ngai te chu MSCI ah an inzai thei tawh dawn tih sawiin damdawiin lian 2 te a chhawk zangkhai thei dawn a ti bawk. MSCI ah Surgery Services hawn thei anih dan tlangpui te sawiin Minister chuan Mizoram PHC ah damlo admit an tlem laiin District Hospital mipuiin an bawr hle a ti a, District khawpuia damdawiin thenkhat leh thingtlang damdawiin hrang hrang hmanraw changkan lama an pachhe deuh tih sawiin Damdawiin lian pawh tih changtlun zel a ngai a ti a, ZMC a IVF, lung zaina Cardiothoracic Surgery bakah thluak zaina Neurosurgery te tan anih theih nan kawng te dap mek anih thu sawiin Sawrkarin damlo enkawlna hmun thuam chak chu a ngai mawimawh tih a sawi bawk.
MSCI ah hian cancer zai thei doctor pathum (gynane onco surgeon, onco surgeon superspecialist leh head and neck onco surgeon) an awm awm tawh a, an mahni puitu anesthesiologist leh thawktu dang dah belhin damlo zai hi tan a ni a, hemi in a mamawh leh a ken tel ICU khum 7 awmna pawh hawng nghal niin Operation Theatres Complex hnuaiah hian Major OT 2 leh Minor OT 1 a awm a. Hengte hi Sawrkar Laipui Scheme ‘Tertiary Cancer Care Centre’ scheme hnuaia din leh sak niin tun dinhmun ah doctor 16 an thawk mek a ni.
