Chief Minister in Zofest a hmanpui
Chief Minister Pu Lalduhoma’n Zo hnahthlak hmun hrang hranga cheng an inpumkhat chho zel a ti a, kohhran thlenga inpumkhatna a awm tawh tih sawiin ramchhung leh rampawna zofate inpumkhatna lam hawi zel a pawimawh tih a sawi. Mizo Zirlai Pawl buatsaih Zofest 2024 West Phailenga Lalbuanga Runa neih a hmanpui na ah sawiin Chief Minister chuan mizoram pawna zofa awm te inpumkhat tura tan lak a pawimawh a ti a, ram hrangah awm mahse zo hnahthlakte chu inpumkhatna lam hawia tan la thar zel turin a chah a ni. Pu Lalduhoma chuan Zofate tam an ngai tih sawiin fa ngah a tul a ti a, Mizoram chu ram dangte nena khaikhinin mi cheng an la tlem tih sawiin Pun chu sawrkar policy a nih avangin nupa, fa pathum leh a aia tam nei chinte hamthatna duan an rilruk a ti bawk.
Chief Minister chuan Ram ro hlu ber chu human resource tha a ni a ti a, Ram leilung hausa tak te pawh a chhunga cheng mipuite thiamna leh theihnain a tlin loh chuan ram changkang an ni lo tih sawiin thalaiten zirna uar a pawimawh a ti a, Handholding hmangin khai chhuah tlak thalaite, an bana kaia din chhuahtir an tum tih sawiin Dahkham ngai lovin hmalakna tur loan an la thei dawn a ti a, thalai ruihhlo avanga thi an tam chu pawi atih thu sawiin ruihhlo do kawngah sawrkarin theihtawp a chhuah chhunzawm zel dawn ati bawk. Kumina Zofest hi vawi sawmna a ni a, thupui atan “Hrui khat vuanin” tih chu hman niin Nizan khan palaite lawmnain hun an tana, vawiin chawhma lam, an hun hnihna hi Chief Minister chuan a telpui a ni.
MZP President Pu Lalthianghlima pawhin thusawiin, MZP in Zofest a buatsaih chhan ber chu zo hnahthlak unaute inkara inremna leh inunauna tha tundin a ni a ti a. Thenawm state ah pawh Zofest chu kum dangah an nghat thin tih sawiin zofate inpumkhat nan MZP chuan hma a la zel dawn tih a sawi bawk.
