Lungleiah Zila Sainik Board an ṭhu khawm
Vawiin chawhnu khan Lunglei Zila Sainik Board (ZSB) chu an President, Lunglei District Bawrhsap Pu R. Lalṭhazuala kaihhruaiin Lunglei DC Conference Hall-ah an ṭhu khawm.
Chairman Pu R. Lalṭhazuala chuan member-te lawmna thu a sawi a. ZSB Secretary, Lunglei District Sainik Welfare & Resettlement Officer (DSW&RO) Maj. Rebecca L. Chhakchhuak (Retd) chuan ṭhut khawm buatsaih chhan a sawi fiah a. Lunglei DSW&RO Office chu kum 1977-a din a nih thu sawiin, sipai bangte buaipuina kawnga harsatna an tawh leh ṭul leh mamawh awm te a tar lang nghal bawk.
He hunah hian LDC leh Group D post hnawh khah chungchang te, sipai bang (ex-serviceman) a tam thei ang ber hna danga rawih nawn an nih theih nana hma lakna tur te, office bungraw tihchangtlunna tur chungchang te, Sainik Area leh Sainik Quarters-a lirthei hunna hmun siam chungchang te, Martarte hriat rengna lungphun – War Memorial Lunglei chei ṭhat chungchang te an sawi ho va. Thu chhawp chhuah leh sawi hote chu a hlawhtlin theih nan thuneitu sang zawka thlen leh bawhzui ni se, tih a ni.
