DoNER Minister in thuthar thehdarhtute kawmin hmarchhak state hmasawnna hrang hrang a sawi
DoNER Minister Pu Jyotiraditya M Scindia chuan Pu Narendra Modi-a kaihhruai sorkar hnuaiah hmarchhak state ten nasa takin hma an sawn a ti. Vawiin khan Ministry of Development of North Eastern Region (DoNER) in Mizorama hna a thawh hrang hrang Chief Minister Pu Lalduhoma nen sawi dun turin DoNER Minister hi a lo kal a. Chief Minister nena hun an hman zawha chanchinbumite a kawmnaah he thu hi sawiin Minister chuan Mizoram thanna tur leh Mizoramin hma a sawnna tura hmathlir hrang hrang leh hna thawh mek te ngun taka Chief Minister nena sawi dun a nih thu a sawi a. DoNER Ministry in nasa Mizoram hmasawn nana hna a thawh thu sawiin vawiinah pawh an department atangin darkar 2 chuang Mizoram hmasawnna tura pawimawh te thutkhawmah an rawn sawi thu a sawi a ni.
DoNER Minister chuan Hmarchhak state te tan a hmaa annual capital expenditure-a cheng vbc 27000 dawn thin kha tunah chuan cheng vbc nuai 1 leh sang 5 an dawng tawh a ti a. Hetah hian inkalpawhnalamah pawh nasa takin hmasawnna a thleng a ni a ti a. Mizoramin kum 2004 atanga kum 2014 inkarah sorkar laipui atangin cheng vbc 4734 a dawn laiin Pu Narendra Modia hnuaiah chuan kum 10 kalta chhungin cheng vbc 33178 dawn a dawng tih sawiin Financial Year 2024-25, kum khat chhung chauh pawhin cheng vbc 6236 lai Mizoramin a dawng a ti a. Telecom lamah pawh hmasawnna nasa tak a awm atih sawiin Minister chuan Mizoram, Meghalaya leh Tripura tan cheng vbc 430 dah a nih thu leh he sum hi state pathuma 4G network tihmasawnnan tangkai taka hman a nih dawn thu a sawi a ni.
Mizoram chuan khualzin hip kawngah te, ram ngaw leh nungcha lama hausaknaah te, infiamna te, huan thlai neih thuah te theihna nasa tak a nei a ni a ti a. Mizoram lo kal leh thuai a duh thu leh, chumi hunah chuan Mizoram lamin an hmasawnna leh hmalakna hrang hrangte, hma lak an tum zel dan te Mizoram lama atanga ngaihthlak theih a beisei thu a sawi a ni. Chief Minister Pu Lalduhoma chuan DoNER Minister chu a sorkar ang chiaha kalphung thar duh a nih thu a sawi a. Minister of DoNER a kaihhruai hnuah thil thar tha tak tak a tihchhuah hnem tawh thu a sawi a ni.
