8th Rashtriya Poshan Maah hmanna kal zelah Serchhhipah kawng zawh leh signature campaign neih a ni
8th Rashtriya Poshan Maah hmanna kal zelah vawiin khan ‘2000 steps a day challenge’ rally neih a ni a. District Programme Office, Women & Child Development hnuaia office hrang hrangte he hunah hian an tel.
DCPU te, OSC te, Shakti Sadan te, CDPO, Serchhip ICDS Office staff te leh Anganwadi Workers leh Helper te inkawpin Rashtriya Poshan Maah hman mekah Serchhip AOC kawn atanga Bazar Traffic point bul thleng kawng an zawh a. He Rally ‘2000 steps a day challenge’ hi hriselna atana taksa insawizawi pawimawhzia mipui hrilhhriatna atana neih a ni.
Kawngzawh bultan hmaa programme tawi buatsaihah Pu James Lalremliana, District Coordinator Poshan Abhiyaan chuan kawng an zawh chhan sawiin hriselna atana hma la tura Intiamna ‘Pledge’ sawi rual a kaihruai a. Pi Caryl Lalpari CDPO, Serchhip ICDS Project chuan taksa sawizawi pawimawhna leh hrisel tur chuan ei leh in fimkhur a ngaih thu te; thau, mawm leh al ei tlem a tulna te a sawi hnuah kawngzawh tan a ni. Kawngzawh hi Bazar Traffic point bulah tawpin hetah hian Hriselna atana intiamna Signature Campaign an nei leh nghal a ni.
