4th Saitual District Secondary School Sports 2025 hawn a ni
Vawiin khan Keifang Centenary Sports Complex-ah, 4th Saitual District Secondary School Sports 2025 hawnna hun hman a ni a, District Bawrhsap Dr. Lalngura Tlau chu khuallian niin a hawng nghal a ni.He hunah hian khuallian Dr. Lalngura Tlau chuan thu a sawi a, Saitual District Secondary School Sports hawnna hun an hmang thei chu lawmawm a tih thu sawiin, zirlaite pawhin inelna thianghlim tak an neih a beisei thu a sawi. Bawrhsap chuan mihring nunah hriselna a pawimawh ber tih a sawi a, hrisel tur chuan ei leh in tih that bakah taksa insawizawi a pawimawh tih a sawi bawk.
Khuallian chuan zirlai naupangte chu infiamna leh lehkha zir lama hlawhtling tur chuan mahni inthunun theihna leh tei rei peihna te a pawimawh tih a sawi a, an inelnaah pawh chak loha awm dan thiam a, a chak te lawmpui thiam turin a fuih nghal a ni. Bawrhsap Dr. Lalngura Tlau chuan he District Secondary School Sports hian mi thiam a chher chhuah a beisei thu a sawi a, infiamnaa tel tur zawng zawng te pawh theih tawp chhuah tura fuihin, a duhsakna a hlan a ni.Vawiin District Secondary School Sports 2025 hawnna inkhawm hi Pu R. Lalhmangaiha, Dy. DPC & Vice Chairman, Organising Committee-in a kai hruai a, Pu Vanlalhriatpuia, Treasurer, Organising Committee chuan hunserh a hmang. Khuallian Dr. Lalngura Tlau chuan thu sawiin, report hi Pu F. Lalthangzuala, Secretary, Organising Committee hnen atangin ngaihthlak a ni bawk.
Naupangten inelna thianghlim an neih theih nan thu an tiam a, he thutiam hi Pu Lalhumliana, Chairman, technical board chuan kai hruaiin, ruihhlo ti lo tura intiamna chu Pu CVL Hmachhuankima, Secretary, Technical Board kaihhruaina hnuaiah neih a ni bawk. Pu R. Lalhmangaiha, Dy. DPC chuan lawmthu sawinain hun a khar a ni.Saitual District Secondary School Sports 2025-ah hian Saitual town area atang school 11 an tel a, town area pawn atang school 8 an tel bawk a ni. Heng school te hi infiamna chi hrang hrang hmangin an inel ang a, October ni 10, 2025-ah hian result puanna hun leh sports kharna hun hman a ni ang.
